Hebrews 11

Mondpa Pili Uⱡ Ei Nga Puⱡ Ei

1Mondᵾk pᵾtmin uⱡ ei mel, Got ndi, tᵾn mel mat nguimp nitim ila, nokundpᵾn mormᵾn. Mel mbᵾ kᵾni nakᵾndpᵾn kᵾn, tetᵾm mint nimbun numan ila, pilpᵾn ambuⱡpᵾn, gi ndupᵾn mormᵾn. 2Unt wamp mbᵾ, Got kᵾn mondᵾk pᵾtᵾng uⱡ elinga, Got ndi, wamp mbᵾ kundpa, uⱡ kun kai mbᵾ etᵾng nitim.

3Tᵾn mondpᵾn pᵾtmᵾn uⱡ ei ndi, pilpᵾn pora ndurmᵾn. Got elim nga ik ei ndi, muⱡ mᵾi raⱡ itim. Got nga mim itim mel mat pora, tᵾn kandᵾrmᵾn. Wote, mel mat itim mbᵾ, tᵾn kᵾni nakᵾndᵾrmᵾn.

4Unt wu Eipel ni, Got kᵾn mondpa pilpa, kaⱡpa tindiⱡim mundrum ila, Got ndi, Eipel nga uⱡ itim ei, numan ngurum. Wote, Kein nga kaⱡpa tindiⱡim mundrum uⱡ ei, Got ndi, numan ngui ngᵾnggᵾrᵾm. Eipel ni, koⱡpa pora ndurum ei nga, wote elim nga mondpa pitim uⱡ ei nga, Got ndi, Eipel wu kun kai nitim. Timan ei, tᵾn akup pᵾnmᵾn. 5Wote, mondpa pili wu Inok ni, Got nga numan pᵾtᵾm uⱡ mbᵾ mel pep roⱡnga, Got ndi, kᵾng pᵾkᵾ mepa muⱡ kona purum. Wu ei, kuⱡi nᵾkᵾrᵾm, kont moⱡnga mepa purum uⱡ ei, wamp mbᵾ ndi andᵾk, Inok kurᵾrᵾng ni, wote kandᵾk ti natᵾtᵾng. Nambuⱡ emel, Got ndi, wu ei oⱡa titim. Wote, Buk Wingti ila nimba mel, Inok ni, akil tepa oⱡa tᵾmba ei nga, kuimp tepa, Got nga numan pᵾtᵾm uⱡ ei mel, pep rurum. 6Wamp ti ndi, Got kᵾn mondpa pili napilim ndam, wote Got nga numan pᵾtᵾm uⱡ mbᵾ, pep rui narᵾmba. Wote, wamp nam ti, Got kᵾn nondpa mbi nimba pilim ndam, Got kupa morum nimba, mondpa pilim wamp ei, wote Got ndi, mel kai mat punt ropa ngumba.

7Wote, wu Nowa nga mondpa pitim uⱡ ei, Got ndi, uⱡ wote pemba mbᵾ mel, unt Nowa kundpa nitim. Nowa ndi, uⱡ ti kᵾni nakᵾndpa moⱡpa kᵾn, Got nga nitim ik ei, kum tepa moⱡpa, nu sip kat rukrᵾm. Etpa pora ndupa kᵾn, elim nga amp kangambuⱡa mbᵾ, ok nu sip ila mukᵾr puk molk, nu wᵾngi nganggᵾrᵾng. Nowa Got kᵾn mondpa pitim uⱡ ila, uⱡ kit etᵾng wamp mbᵾ, ropa mana mondpa, elim Got kᵾn kun kai murum.

8Wote, mondpa pili uⱡ ila ku, Got ndi, Aparam ni, wi roⱡnga, pilpa pep ropa, elim nga kona wak ropa, mᵾi kᵾmp elpa ti, Got ndi, nguimp nitim ila purum. Wote, Aparam mba kona ei, pili napilpa kᵾn, Got nga nitim ik ei, mondpa pilpa purum. 9Mondpa pili uⱡ ila, Aparam Got ndi, nguimp nitim kona ila mba, wamp tᵾma raⱡpa, muⱡ manga raⱡpa pitim. Ei kᵾn, Got nga nimba mᵾi rurum uⱡ ei, Aisak, Jekop raⱡ kᵾn kunda pitim wu raⱡ, kunda muⱡ manga pek morung. 10Ni kᵾn, Aparam ndi, rᵾk rᵾk mondpa pilpa moⱡpa kᵾn, kona peng ronduⱡ ti, Got elim ndi, ku pol ila, rukrᵾm ei kᵾnimp nimba, nokundpa mint murum. 11Wote, amp Sera i ku etpa, Got kᵾn mondpa pitim. Elim nga kangambuⱡa memba ui ei pora nitim. Ei nga, wote Sera elim, Got kᵾn mondpa pitim uⱡ ei ndi, kang ti mitim. Sera elim nga numan ila pilpa kᵾn, unt Got ndi, nimba mᵾi ropa na, kangambuⱡa min nitim uⱡ ei, kupa mint nimba pilpa moⱡpa, kang ei mitim. 12Ei nga, Aparam ni, anda etpa pora ndupa, nondpa koⱡmba etpa kᵾn, wamp ama puⱡi nga anda kouwᵾ ei murum. Wamp kaⱡpa tᵾtᵾm mbᵾ, ku ok na, mipil na mbᵾ mel kapⱡa morung. Wamp ti ndi, kapⱡa kᵾmp ropa pora ndui nandᵾmba, mon!

13Wamp ninmᵾn mbᵾ, Got kᵾn mondᵾk pilik molk kᵾn korung. Wamp mbᵾ mᵾi kona ila kont molk kᵾn, Got ndi unt, nimba mᵾi ropa nguimp nitim mel mbᵾ, kandᵾk ti natᵾtᵾng, mon! Wamp mbᵾ, en enim nga numan ila, Got nga mel mbᵾ, ruⱡ etᵾk kandᵾk molk, numan nguk nᵾk mel, “Tᵾn ya mᵾi kona ila monmᵾn uⱡ ei, wamp tᵾma na, kona elpa wamp na ni mel, manga poning ombun mormᵾn,” nᵾtᵾng. 14Wamp mbᵾ ndi, ik mat ei mel nᵾk eng ndam, tᵾn ndi, kanda pilimin ei, en enim nga mᵾi mendpᵾⱡ ei, muⱡ kona kuruk ning. 15Unt en enim molk orung mᵾi ei, int nduk pili napᵾtᵾng. Wote pilingina ndam, en enim molk orung mᵾi ila, int puⱡᵾngina ku. 16Wote, ei kelik wamp mbᵾ ndi, en enim nga kona kai tila mbin nᵾk, numan mondrᵾng ei, muⱡ kona. Wamp mbᵾ ndi, Got kundᵾk, nᵾk mel, “Nim tᵾn nga, Got nᵾtmin. Uⱡ ei nga, Got pipil kuⱡi nakᵾrᵾm, mon,” nᵾtᵾng. Nambuⱡ emel, wamp mbᵾ nga kona peng kai ti, tᵾpa kun etpa tinditim.

17Unt Got ndi, Aparam oⱡa tᵾpa kundrum ei kᵾn, Aparam elim nga mondpa pili uⱡ ila, kangᵾm Aisak Got kᵾn kaⱡpa tindiⱡim mundrum. Got ndi, Aparam kᵾn nimba mᵾi ropa itim uⱡ mbᵾ, pilpa kelpa, elim nga kangᵾm tenda mendpᵾⱡ ei, Got kᵾn kaⱡpa tindiⱡim mundᵾmba itim. Got ndi, Aparam kundpa nimba mel,

“Nim nga wamp rᵾⱡaip minal, wote kalk ting mbᵾ, nim nga kangnᵾm Aisak kᵾn kalk ting,” nitim.
19Aparam elim nga numan ila pilpa kᵾn, Aisak rop kundunt ndam, Got ndi, etpa kont tᵾmba nimba pitim. Wote, elim pitim ei mel ku, Got ndi, Aisak etpa kont titim.

20Mondpa pili uⱡ ila ku, Aisak ndi, Jekop kᵾn Iso raⱡ, akil tepa uⱡ omba ei ndi, memp tinggil nimba, pilpa memp pinditim.

21Mondpa pili uⱡ ila ku moⱡpa, Jekop ni, elim koⱡmba ui ei, nondpa elinga kᵾn, Josep nga kangᵾm wu raⱡ memp pinditim. Ni kᵾn, elim nga tᵾmbᵾⱡ ti, mepa ᵾndrᵾm ni tᵾpa angᵾndpa, ambuⱡpa moⱡpa, Got nga mbi paka rundrᵾm.

22Mondpa pili uⱡ ila ku, Josep koⱡmba ui ei, nondpa elinga kᵾn, wote ui tila Isrel wamp mbᵾ, Isip kona ila wak rok ping nitim. Wote, elim kunt kᵾn, elim nga kᵾng kᵾⱡ, mek ping nimba man ngurum.

23Mondpa pili uⱡ ila ku, Moses nga tipam mam raⱡ ndi, Moses mek tᵾkᵾⱡ, Moses kandrᵾnggil ni, kang kai itim ila, wu nuim mumuk Pero nga mundmong iti natᵾkᵾⱡ. Kang ni, mo rokᵾⱡ tek moⱡᵾnggila, kalimp raldika itim. 24Mondpa pili uⱡ ila ku, Moses ni, wu etpa kᵾn, elim wu nuim mumuk Pero mbuⱡam nga kangᵾm nᵾk, mbi ti nᵾteing nimba pitim. 25Got nga wamp mbᵾ mbun tᵾtᵾng uⱡ ei mel, Moses elim timp nimba pitim. Ui onunga etpa ila, uⱡ kit mbila ambᵾⱡᵾp paⱡᵾp, muⱡi nᵾmbᵾⱡimp nimba pitim. 26Moses elim pilpa kᵾn, Got ndi, Kraist ngumba mundᵾmba ei nga mbi ila, mindil timp nimba kᵾn, Isip wamp mbᵾ nga ku moni na mel kai mbᵾ pora, tᵾpa mana ndurum. Ei nambuⱡ emel, Got ndi, elim punt ropa mel mat, wote ngumba mint nimba pitim. 27Mondpa pili uⱡ ila ku, Moses ndi, wu nuim mumuk ei nga popᵾⱡ kurum uⱡ ei nga, mundmong iti natᵾpa, Isip kona ei, wak ropa purum. Moses ndi, mundmong iti nᵾtᵾtᵾm. Ei nambuⱡ emel, wamp mbᵾ ndi, kᵾni nakᵾndᵾrmin Got ei, elim Got kᵾndrᵾm mel elinga, wote ronduⱡ mba murum. 28Mondpa pili uⱡ ila ku, Moses ndi, Etpa Ti Rᵾng wingti kaⱡmba etpa kᵾn, Isrel wamp mbᵾ kundpa, nimba mel, “En enim nga kng sipsip mbᵾ, rok kondᵾk, mema mbᵾ ndi, en enim nga manga keta puⱡ puⱡ mbila kopung kundᵾi!” nitim. Ei nambuⱡ emel, wamp rorum anggelo ei ndi omba, Isrel kang kumina mbᵾ ropa, kundi nᵾkᵾndangga nimba itim.

29Unt Isrel wamp mbᵾ, Got kᵾn mondᵾk pᵾtᵾng uⱡ ei ndi ku, Num Kuta Kunt mam ei, kᵾr nilinga, mᵾi ei kᵾp etpa titim nila, nombuⱡa mam purung. Ni kᵾn, Isip wamp akil tek purung nimbᵾ, nu wanggᵾk korung.

30Isrel wamp mbᵾ, Got kᵾn mondᵾk pᵾtᵾng uⱡ ei ndi ku, Jeriko kona peng ei nga ku paⱡa petᵾm ni, andᵾk tᵾk pok elingina, rumbᵾⱡ 7 elinga, ku paⱡa ni ᵾⱡmbᵾⱡ nitim.

31Wote, mondpa pitim uⱡ ei ndi ku, amp wapra Reiyap ni, ik tᵾk roi ndurᵾng wamp mbᵾ, korung ei mel, kuⱡi nᵾkᵾrᵾm. Ei nambuⱡ emel, amp ei ndi, Isrel wu ralt, Jeriko kona tᵾng ndukᵾⱡ purᵾnggil raⱡ, rawe etpa tᵾpa rᵾpᵾndrᵾm.

32Akup na ndi, namba ik mat ou ndupa nimp? Na ndi, wu Giriyon, Barak, Samson, Jepta, Depit, Samwel na, painui wu na mbᵾ nga timan minal petᵾm mbᵾ, nimp ei nga ui ei, pora ninim. 33Wu mbᵾ ndi, Got kᵾn mondᵾk pᵾtᵾng uⱡ ei ndi, kona ou mbila el etᵾk kᵾn, wu nuim mumuk mat nga el wu mbᵾ, rok mana nduk, uⱡ kun kai mbᵾ mint etᵾk, Got ndi, nimba mᵾi ropa nguimp nitim mel mbᵾ, kandᵾk tᵾtᵾng. Wote kui laiyon, wamp norung ei nga keta mbᵾ, ambulk rou rok etᵾng. 34Mondpa pili uⱡ ila ku, wu mbᵾ ndi, ndip anmbil mam mbᵾ, rok kumundᵾk, kur koiya nengina nurung mbᵾ ndi, rok kundi nakᵾndrᵾng. Wote, ronduⱡ pi napᵾrmᵾn wu nimbᵾ, wote ronduⱡ purung. El iting uⱡ mbila, wu ronduⱡ mbᵾ molk, el wu rᵾⱡaip elpa mam mat, tᵾk pok etᵾk rorung. 35Mondpa pili uⱡ ila ku, wamp korung mbᵾ, rok rut nduk tᵾk, mamᵾl mbᵾ ngorung. Wamp mat mondᵾk pili uⱡ ila nga, nᵾk tᵾk kan ngurung. Wote, wak rorung ei kᵾn, mondᵾk pili uⱡ ei, aldpa ambulk ku morung. Ni kᵾn, el wu mbᵾ ndi, mindil kit mbᵾ ngok rok kondrung. Uⱡ ei, wote rut nᵾk, kont mba mul uⱡ kai ei, kandᵾp timin nᵾk etᵾng. 36Wote wamp mat, el wu mbᵾ ndi, kan puⱡa ndi rok, oi endᵾk, kᵾmp ki mbᵾ, kan sen ndi, kan nguk, kan manga ila tᵾk pendᵾtᵾng. 37Wote, el wu mbᵾ ndi, wamp mbᵾ, ku ndi rok, so ndi, wamp mat, koⱡmung etᵾk raⱡ endᵾk, kur koiya ndi, wamp mat rok kondᵾk etᵾng. Wote, mondpa pili wamp mat, ronduⱡ purmᵾn mbᵾ ndi, kng meme na, kng sipsip mbᵾ nga kᵾng mbᵾ tᵾk, mbuⱡ mbal mel ralk andᵾk morung. Nambuⱡ emel, wamp mbᵾ, kurpa mat morung. Wote, wamp el rui mbᵾ ndi, wamp mbᵾ, mbun tᵾk ngᵾk, rᵾp etᵾk, kai mundi namᵾndrᵾng. 38Ei nga, ya mᵾi kona ila wamp mbᵾ muⱡing ei nga kapⱡa iti nᵾtᵾtᵾm. Wamp mbᵾ, nung nᵾk puk, wamp pi napᵾtmᵾn kona kui waka na, komnga na, ku manga na, mᵾi mur na kona mbila puk petᵾng. 39Wote, Got kᵾn mondᵾk pᵾtᵾng wamp mbᵾ, Got nga kuimp keta ila mbi kai ting. Unt Got ndi, nguimp nimba mᵾi rurum mel mbᵾ, ngᵾi ngᵾnggᵾrᵾm mon! 40Unt Got ndi, tᵾn nga mel mat nguimp nitim mel kai mbᵾ, tᵾpa kun etpa tendpa morum. Unt mondᵾk pᵾtᵾng wamp mbᵾ ndi, kuimp tek puk ti natᵾtᵾng mon! Nambuⱡ emel, tᵾn kᵾn kunda Got ndi, tᵾn pora etpa kun kai mondᵾmba.